Arvind (Ana) N. Mambreachi lhan kotha
Devanagarintlem Romi lipiantor ani Purtugez bhaxantor korpi – Óscar de Noronha
Ponnji: Manddviche deger patllaun boxil’lem hem ek xhar. Hanga motarint pavta. Bosint pavta. Bottint pavta. Bott zalear Ponnjechea sam’ki kallzak tenkta. Ti matxi usram pavli zalear, polasint bhitor sorun mukhel-montreak zap diun magir tumcheani ghora vochum ieta.
Xhar
Ponnji Tiswaddint asa. Tiswaddiche lokvosti sadharonn lakhavoir. Poikim Ponnjent sadharonn satt-ek hozar ravtat. Pavsachea tempar Ponnjent paus khub poddta. Rostear zollim-mollim khatonnam zatat. Passei-hancher xello zata. Punn paim nisrun mat konn poddnant. Karonn Ponnjeche lok toxe toklen fin. Xiam tempar xim khub khata. Punn Ponnjekar kudkuddnant. Fokot gimant kalor khub zata ten’na mat’ te bettech taptat. (Kaloran Ponnjekaranchi xir rokddich titt zata).
Ponnjent rajachi ek polas asa (tika Palácio de Idalcão mhonntat). Ponnjentleo her soglleo polasi Ponnjekarani bandlea. Devulvaddear, Altinho, Santa Inez ani Campalar g-h-e mhonnun polasi asat. Ponnjekarancho poiso soglo tangelea ghorani ani motarini otla. Hangasol’lea choddxea ghorank monxanchim nanvam – Govinda, Sushila, Gurunath, Souza, Mascarenhas, Heera, Prema, Dempo, Velho, oslim.
Ponnjent ghoranchea zoteank nogram mhonntat – Adarshnagar, Neuginagar, Kundaikarnagar bi. Hea disamni don sorkari odhikari devulvaddear ghoram bandtat. Tanchim nanvam – Bhaunagar and Tainagar. Campalar eklo blakist ghor bandta tache nanv – Komagattamarunagar.
Ponnjechea nogramvori nogram akh’khea sonvsarant na mhonnttat. Poir Amerikechea President Ford-an Washingtonak khoim eke election-hache sobhent sanglem, mhaka tumi venchun dixeat zalear tumkam hanv Ponnjechea Kundaikarnagaravori ek nagar bandun ditolom.
Tibluchem ghor
Tibluchem ghor khub lhan. Tantunt monxam him: avoi, bapui ani Tiblu. Tiblu ekloch zolmak ail’lo. Zolmak ietnach ievzupak lagil’lo, ho sonvsar oso kitem? Lhanponnan Tiblu roddonaslo. Khub usram to ulounk lagil’lo. Ulounk laglo tori to uloinaslo. To fokot ievjitalo. Vachtalo. Boroitalo. Chitram kaddtalo. Uloi mat’ naslo.
Roste
Ponnjent roste bore xekan’xek patoll’leat. Ponnjeche lokamvori Ponnjeche roste-i bore susegad-xe. Disbhor jemet astat. Ponnje eka rostear choltanach monis dusrea rostear pavta. Ponnjechea pattear bhitor soril’lo monis soroll cholunk lagot zalear João Castro – José Falcão – Dada Vaidya rosteavelean bodh Ponnji sompta thoim pavum ieta. Hea rosteanchi ekuch bori gozal mhollear Ponnjechea lokank zati-kati-dhorm lagtat te tankam lagonant. Hea rosteanchea nimitant Dada Vaidya, dotor Atma Borcar, Shirgaonkar he babdde Afonso de Albuquerque, Cunha Rivara, Bénard Guedes, Governador Pestana hanche pongtik bosunk pavleat. Ponnjent 5 October, 18 Jun, 31 Janer oslei roste asat. 31 Janer ani Rua de Ourém hanchemodim il’lexem ek Portugal asa ani Devulvaddear ek supul’lo-so Maharashtr asa.
Lok
Ponnjek lambai-rundai bori asa. Punn itleim asun Ponnjekaranchi monam sam’kim oxir. Toxe Ponnjent sogle toreche lok asat – bore, vaitt, sadhe, xanne, pixe, sadhe-bore, bore-bore, xanne-bore, pixe-bore, sadhe-xanne, sadhe-pixe, xanne-xanne (dedd-xanne), pixe-xanne. Hanga vepari, blakist, professor, dotor, advogad, ijiner, oxetoreche-i lok ravtat. Mineir mat vhoddlexe nat. Punn je asat tanchebogor her lokanchem paul ukholna. Dil’lintle sogle montrilegit tankam vollkhotat.
Tibluchem vachop
Tibluk lhanponnapasun vachpacho nad. To ghorant zollim-mollim bosun vachtalo. Bhailea humrear, randche kuddint, iskadesokla, magildara. Tiblucho bapui bolkanvant ontorraxtrik rajkornnacher bhasabhas kortalo ten’na Tiblu khoimtori khanchi-konnxak bosun chitram kaddtalo.
Zantto zatokuch Tibluk konnetori mhollem, Tiblu, tum laibrorint kiteak vochonam?
Tibluk tea monxean Sorosvotimondir dakhoilem. Tedischean Tiblu thoimsor vochun bosunk laglo. Sokallim iskolant vochop. Jevop-khavop, abheas korop, chea ghevop. Magir laibrorint vochop. Bodh ratcho attank ghora portop. Jevop-khavop, chitram kaddunk bosop. Il’lo il’lo korun Tiblu borounk-ui xikil’lo. Kovita korunk lagil’lo…
Nanvam ani zati
Ponnjent eka nanvache, dotti nanvanche lok khub. Poi, Bholo, Poi-Bholo; Duklo, Bhobo, Duklo-Bhobo; Bhobo, Kakulo, Bhobo-Kakulo; Souza, Paul, Souza-Paul; Kamat, Ghanekar, Kamat Ghanekar; Sequeira, Nazareth, Sequeira Nazareth. Khottkhotto, Zingddo, Buttulo, Buddkulo, Topanxett oslei monis Ponnjent ravtat. Ekach nanvache hanga khubxe lok melltat: Dotor Costa, Professor Costa, Advogad Costa; Professor Nadkarni, Advogad Nadkarni, Dotor Nadkarni; Dotor Boddko, Advogad Boddko, Professor Boddko. Konnso mhonttalo, Santa Inez oxetoren 15 Desai (Sardesai dhorun), 12 Kamat ani 9 Nayak ravtat.
Svotantrataiepoilim Ponnjent donuch zati asleo – poixekar ani Ponnjekar. Mineir, blakist, vepari, empregad he sogle poixekar. Her sogle Ponnjekar. Mhollear Bahujan-samaj. Svotantrataie uprant hatunt anik don zatinchi bor poddli – montri ani deputationist. Poinkim deputationist hi scheduled caste.
Ponnjeche montri khub uloitat. Zai title uloitat. Naka titlei uloitat. Ponnjekarancheo sobha montreambogor zainant. Montreanchem pavl sobham bogor ukholna. Sadharonn montreanchem uloup oxem asta:
Janten hem korunk zai.
Janten tem korunk zai.
Janten soglem korunk zai.
Sogle Ponnjekar (poixekar ani Bahujansamaj) montreank khub lekhtat. Tantle tantunt poixekar tankam chod lekhtat. Adlea kallar zanche hat Purtugez rajeakorteomeren pavil’le tanche hat atam montream-meren pavleat.
Ponnjent man koro tigank: montreank, montreanchea parentank ani montreanchea vollkhicheank (hantunt sezari aile). Uprant sorkari odhikoreank. Montreank zaum odhikoreank zo vollkhona to Ponnjent sandloch.
Xinu
Xinuchi pirai 60 vorsam. Tachem borem chol’lam. Vepar, min, blak, rajkaronn… to sogleant asa. Hachem ghevop taka divop ho tacho vepar. Zachem ghetlam tachem naddear to min kaddta. Zaka dilam tachea malvozar to blak korta. Zachem ghetlam ani zaka dilam taka gheun to montreanger ani amdaranger favtti marta. Sod’deache assemblintle don montri ani dha amdar aple, Xinuchem mhonn’nem.
Sonstha
Lions Club, Rotary Club, Junior Chamber, Goa Chamber of Commerce, Konkani Bhasha Mandal, Marathi Sahitya Sevok Mandal, Bhagini Mandal, Mine Owners Association, Exporters’ Association, Indo-Soviet Cultural Society, Rose Society, Vivekanand Society… kitleosoch sonstha. Chear Ponnjekar ektthaim ailear panch sonstha kaddtat. Hangasol’lo ek-ek monis dha-dha sonsthancho membr asta. Ponnjentle khubxe vhodd monis hea sonsthanche membr. Hangsol’le lhan monis vhodd monxancher uloitat. Vhodd monis odik vhodd monxancher uloitat. Sorkar jantecher uloita.
Ponnjent vhoddlixi janta na. Dispotti ji hanga janta dista ti bhailea ganvsun – Merxe, Kalapur, Raibandar, Tallganv – ail’li asta. Ken’na-ken’nai ti Kansavli, Kolvall, Divaddi, Pednem, Sall, Bannavli hangacheanui ail’li asta. Khasa Ponnjent ji il’lixi janta asa ti Molleant, Bhatleant bi ravta. Poixekar Altinho, Campalar ravtat. Ponnjecho Devulvaddo ani Santa Inez hanga donui toreche lok ravtat.
Altinho eka kallar fokot vhodd monisuch ravtale. Atam thoim montri, sorkari odhikari ani pixe-i rautat. Montri ani poixekar motarani bhonvtat mhonnun her monxapasun te matxe veglle distat.
Lions Club, Rotary Club hancheo sobha sodam vhoddlea hotelamni zatat. Konkani, Marathi mondollancheo sobha lhan’xe kuddani zatat. Te club ganv poske ghetat. Monddolam vorsbhor sompil’lea sahiteakanche zolmdis ani mornndis manoitat. Reformad sorkari empregad vell pasar korpakhatir hea kareavollink ietat. Vivekanand ani Rose sosaitianchea songit kareavollink/prodorxonank mat sogle Ponnjekar bail-bhurgeank ghevun vetat.
Tibluchi dairi
Poir igorjechea festak mhaka Xinudaad mell’lo. Khub uloilo. Chaitr punvechea nattkant aplea putak part mell’la mhonnun sangtalo. Mhaka mhonnunk laglo, ‘Tum kitem korta?’ Hanvem mhollem, ‘Chitram kaddtam, kovita boroita.’ To mhonnunk laglo, ‘Video kiteak vikina?’
Nustem
Baki Ponnjekarank nusteabogor zaina. Bazarant nustem borem ieta. Sungttam, moteallim, vel’leo, pedve, balle, korchanneo, mudd’doxeo, xenvtalleo, kallundram, sorgem, bangdde, xenvtte, kol’leo, moreo, sangttam, visvon, gobre, tisreo, khube, xinnaneo … Soglem tea tea tempar ieta. Punn sogleank tem ghevop zomona. Sogle bazarant dispotte nustem haddunk mhonnun vetat. Bhitol’le orde tem mharog uzo mhonnun viktem ghenastanam porte ietat. Horxim ho ‘uzo’ poixekaranchea ghoramni dispotto pett’ta.
Nustem khavun, nhid kaddun, uttun, chea ghevun Ponnjekar sanjche passeik vetat. Zanchekodden motari asat te Miramar vetat. Zankam pai asat te Campalar vetat.
Devull and igorz
Hanga ek devull ani ek igorz asa. Ponnjentle poixekar sou dis patkam kortat ani satvea disa devullant, igorjent vetat, oxem her Ponnjekaranchem mhonn’nem (korem fot, Dev zanna!). Hi gozal khori asot zalear dusri-i ek gozal titlich khori. Tea devullantli ani te igorjentli – dogui saibinni – tankam tanche guneanv bhogxitat.
Devull Mahalaxmichem. Hea devullant amorechea vellar dive lagtat. Te dive polloun Professor Borcaran ‘Tethe kor mhaze jullti’ oxi ek kovita boroili. Ani akh’khea Maharashtrak ti khub’ manouli. Ten’nachean sogli Marathi janta tankam Kovi Borcar mhonnun vollkunk lagli… Hi khobor devullachea manddapantlea sopear bosun ek Ponnjekar dusrea Ponnjekarak sangta. Ani tea vellar devullant purann cholta.
Tibluchi dairi
… atam hanv korum kitem? Mhaka vachop zomona. Chitram kaddop zomona. Kovita korop zomona. Vetam thoim lokancho kochkoch. Bovall. Laibrariank legit atam tintteanchem rup ievunk laglam. Paddpoddil’le he lok ghorcheo gozali thoim ievun kiteak kortat, hanv nokllom, bovall… bovall… bovall… Soglekodden bovall… Hanv vachpakhatir zago sodunk laglom. Kitleaxea lokamni mhaka kitleoxoch suchovnneo keleo (baki Ponnjekar suchovnneo korunk huxar!). Konn mhonnunk laglo, Campalar voch. Konn mhonnunk laglo, Miramar voch. Raibondarchea pattear… Merxeche vatter… Altineachea dongrar, mosnnant, fonddant… Sogleamni sogle zage sangle. Ek dis hanv Altinho bismache polasikoden vochun boslom. Thoim ek padri ailo. Mhonnunk laglo, hea sonvsarant soglem k-u-i.
– Mhonttokuch hanv kitem korum?
– Tum pustok vachunk hinga kiteak eilai?
– Khoi vochum tor?
– Simiterint. Tinga tuka kosloch bobav aikunk ievpacho na.
Tedischean hanv Santa Inez simiterint (mosnnant mhonnunk borem disona) vochun bosunk laglom.
Turist
Ponnjent turist khub ietat. ‘Dona Paula sundor disto’ mhonntat. Konnui muddaxekar dislear, ‘ha bogha Goveacha mannus’ mhonnun bott dakhoitat. Uprant barramnim vetat. Ani piye piye pietat.
Xinu sodanch mhonnta, hanka chorank jite marunk zai. He Mumboiche dollidri lok hanga ievun amgeli Ponnji padd ghaltat, tachem mhonn’nem. Teaporos te hippie bore. (Tanchekoddlean Xinuk bhorpur foren jinam, lugttam, goddeali, keseti bi melltat).
Simiterint Tiblu
… Atam Tibluk tanchi sonvoi zalea. Sonxebaab, Hundirmam, Bangdde Porob, Pandu Fott’to, Vitu Sawant, Xedd’do, Visvonn, Boklo, Doddearo, Vonibai, Tai-bai… sogleanchim bhutam tachekodden loktubaien uloitat.
Poir Sonxebaab boro talar ail’lo. Tibluk mhonnunk laglo, hanv tea vellar melom mhonnun suttlom. Nazalear tujechvori jivak vittlom aslom. Ponnji mhonntat ti atam sam’ki vitt ievpasarki zalea. Hanga he mosunddent tori ken’nai boro varo ieta. Bodh Purtugezanchea tempar Ponnjent golltalo toso. Toso varo ailo mhonntokuch mon sam’kem khoxi zata! Oxem dista to babddo Salazaruch sorgantsun ho varo amkam dhaddinam mum?
Sonxebaab huddkea-huddkeani roddunk laglo. Tiblu bienlo. Dolle motte korun aikot ravlo. Sonxebabak Tibluchi kakullot aili kai kitem konn zanna? Roddop tharavn thoddea vellan to mhonnunk laglo: – ‘Tiblu, papea, soglo ganv soddun tum hanga mosnnant dispotto kiteak ieta?
– Pustokam vachunk, Tiblunk biet biet zap dili.
– Pustokam vachun tum kitem kortolo?
– Mha… mhaka vhoddlo monis zavpacho asa.
– Mhojem aikotolo?
– Aikotam. Sang!
– Rajkornnant bhitor sor.
– Ani kitem korum?
– Gõycho mukhelmontri za.
– Kiteakiteim kitem sangta?
– Bhau mukhelmontri zalo. Tai mukhelmontri zali. Atam Babu mukhelmontri zatolo. Tea adim tum mukhelmontri za. Adim zomlem na zalear uprant za. Punn zolmant ek favt tori Gõycho mukhelmontri za ani jivitachem kalyann korun ghe! Tathastu!!
Tedischean Tiblun vachop soddlem…