Dalgado, Konknnicho Martir ani Sant
Konknni Xastri Monsenhor Sebastião Rodolfo Dalgado-hachea 171vea zolm vorsuki ugddasa somoyar mhaka mukhel soiro koso apoilo mhunn Akademi-cho Odheokx Fr Myron Barreto-haka ani somitik Deu borem korum mhonntam. Ho dis urben ani dhinvasnneche monan monoitat mhunn, soglleam vangddeank porbim.
Xabaski mhojea ixttak, aichem mukhel ulovp korpi, Willy Goes-babak, zannem umedin Monsenhor Dalgado-hachem jivit amchea mukhar dovorlem. Willy-bab ek boro kolakar, sahityakar, ani somajik vavr korpi. 2014 vorsa ami Commemorating Christ in Goa, hem pustok uzvaddaunk vangdda kam’ kelam. Tache kodden kam’ korpak sodanch khoxi bhogta.
Mhotvachem mhollear, Akademiche spordhent vantto ghetloleank hanv hun’hunit porbim ditam. Tumchi urba chalu dovorchi ani fuddlem paul marchem mhunn magtam. Akademiche karyanim vantto gheuncho. Veg-vegllea spordhent bhag gheuncho ani, bhov korun, masikant tumchem borop zaunchem. Zoitivontank ani spordhent vantto ghetla titleankui porbim ani Devachem bensanv.
Az ami zomleanv Monsenhor Dalgadacho zolm disacho ugddas monoupak. Te mhaka kiteak avoddttat tem thoddea utramnim tumkam sangunk sodtam.
Monsenhor Dalgado, ek misionar, Katolk dhormancho ani Konknni bhaxecho. Te zaite vaurle, ani diabet zaun tache paim katorle, to wheelchair-ar ani hantrunar url’lo, punn sonvsarak Konknnichi bori khobor porgottlie xivai raunk nam. Te Sanskrut zannar, ani ti zannvai tannem Konknniche sevek vaporli. To ek prodhyapak zaun-ui, ivory tower-acher ravunk nam. Te Orientalist ani zaite bhaxeche zannkar: tem xikop tannem sodanch Konknni khatir kelem ani tichem nanv fankoilem.
Mhojea ispan, Monsenhor Dalgado Konknnicho martir, Konknnicho sant. Kiteak? Konknnichi beporva zatali tednam, Konknichem vaitt ulounnem zatalem tednam, Konknnicher viruddh vetale tednam, konn ube zale? Je konn Lisboa xarant, wheelchair-acher asle te. Monsenhor Dalgado sogllem nittayer ghalunk te ube zale; Konknni rakhunk fuddem sorle.
Zoxem heam disamni ‘enough is enough’ ho naro famad zala, toxench 1917 hea vorsa, Monsenhor Dalgadan apnnachea monan ‘enough is enough’ mhunnon, Heraldo-hea disalleacher ek lekhmall boroilo, ‘O concani não é dialecto do marata’, mhonnge, Konknni Morathi-chi boli nhoi. Tannem kitem mhollem ani koxem mhollem tem bore bhaxen aikat – Portugezint boroilam tem hanvem Inglezint onnkar kelam:
“This time my only goal was to break a lance for ‘my lady’ and to avenge the wild invectives that cowardly hands threw at her, mercilessly and with iron fists, but also – sorry to say! – with neither knowledge nor conscience.”
Konnachich porti zap zali na. Panch vorsam uprant te ontorle. Tednam, tache vangddi ube zale, dekhik Professor Mariano Saldanha, zo Monsenhor Dalgado-hache Lisboa vishvavidyaloian xis asle. 1929-hea vorsa, Monsenhor Dalgado-hachi suvat bhorunk Portugez sorkaran Professor Saldanha-k apoilo, zo Ponnje Liceu-ant Sanskrut xikoitalo. Dalgado ani Saldanha, bapui ani put koxe. Ani natu? Ami natu mhunn somzun, Konknni familichem nanv voir kaddum-ia.
Professor Saldanha Romi lipiecho adhari; desache zaite zannar, zoxe Suniti Kumar Chatterjee, Babu Govind Das hannim, ani dusreachim nanvam kaddun, hi lipi Bharotacheo bhaso koxe toren vaprunk zata tem tannim spoxttponnim dakhoilem.
Tankam mog aslo toso amkam aslear, amim dubhava vinn fuddem pavtolim. Aiz poreant, soyi pormonnem cholun, ami Portugez xikleanv, ani aiz Inglez xiktanv, ani kenna-kenna Konknni visortanv. Konknni amchi mãi khori, punn ami tichi porva korunk nam. Aiz kall, ticho valor, tichem mol, novie pillgek dakhounk favo. Ti amkam koxi lagu zata, vo relevant asa, tem dakhounk favo. Atamchi ani fuddarachi poristithi polleun kam’ korunk favo.
Halinch, zo Akademin Inglez-Konknni sobdkox uzvaddaila to ekdom’ gorjecho aslo. Porbim! Vegim-vegim Konknni-Inglez kox toiar kelear borem. Tiech borobor, Romi lipi vegim-vegim promanbod’d korunk zai, vigneanik utravoll toiar korunk zai, ani sahityachem kam’ (borovop ani onnkarop) fuddem kaddunk zai. Ani ami kortanv titlem lokak dehan ani bud’dhi vixin mello sarkem zanvchem. Chodd korun, ami amche bhaxecho mog korunk favo. Love conquers all.
Mhojim don utram sompoumche poilim, ani ek pavtt tumkam xabaski ani, mhaka apoilo mhunn, Dalgado Konknni Akademik dhinvastam.
